നീ കൂടെയുണ്ടെങ്കിൽ

നീ കൂടെയുണ്ടെങ്കിൽ

നീ കൂട്ടിനുണ്ടെങ്കിൽ

എല്ലാം എല്ലാം എത്ര സുന്ദരം

മഴയായ്‌ മുകിലായ്‌ നീ

മനസ്സിലൊരു ചിത്രം വരയ്ക്കും.

ചിലപ്പോളൊരു കിളികൊഞ്ചലായി

പിന്നെ എന്റെ ഏകാന്ത -

രാവുകളിലൊരു ചിലങ്കതൻ നാദമായി!

പാതിയടഞ്ഞൊരാ കിളിവാതിലിൻ

വിടവിലൂടൊഴുകിയെത്തും നിലാവായി

എന്റെ ഉറക്കത്തിൽ നീയൊരു-

സ്വപ്നമായ്‌ കൂട്ടുവന്നു.

ഉണർന്നിരുന്നപ്പോൾ നീ യൊരു-

പകൽക്കിനാവായ്‌ ചേർന്നിരുന്നു.

വിതുമ്പാൻ തുടങ്ങുമ്പോളൊരു-

കുളിർത്തെന്നലായ്‌ നീയെന്നെത്തഴുകിയില്ലേ

കാലിടറുമ്പോളൊരുകൈത്താങ്ങായി!

കാലൊച്ചയില്ലാതെ നീ പിൻ തുടരും.

കാണാൻ കൊതിക്കുമ്പോളൊരു-

കണിവിളക്കായ്‌ മുന്നിൽ തെളിയും.

ഓർമ്മകളേ നിങ്ങളില്ലായിരുന്നെങ്കിലീ-

ജീവിതം വെറും ഒരുമരുഭൂമി.